Қонуни нав дар Русия имконоти васеътари бонкдории исломиро фароҳам мекунад?

Депутатҳои Думаи давлатии Русия дар қироати дуюм ва сеюм қонуни наверо қабул карданд, ки доираи таҷрибаи шарикии молиявӣ ё бонкдории исломӣ-ро дар минтақаҳои пилотии кишвар васеъ мекунад. Тибқи ин санад, Бошқирдистон, Доғистон, Тотористон ва Чеченистон ҳамчунон иштирокчиёни ин озмоиш боқӣ мемонанд.

Қонуни мазкур таъсиси як кумитаи махсусро пешбинӣ мекунад, ки масъули таҳияи стандартҳои бонкдории исломӣ хоҳад буд. Ба ҳайати ин кумита намояндагони калидии муассисаҳои молиявӣ шомил мегарданд, ки то 1 сентябри соли 2025 дар феҳристи расмии иштирокчиёни таҷриба сабт шудаанд.

Қонун рӯйхати амалиёт ва муомилоти иҷозатдодашудаи бонкдории шарикиро низ васеъ мекунад. Акнун ин рӯйхатро чунин намудҳои хизматрасонӣ дар бар мегиранд:

• суғуртаи мутақобилаи манфиатҳои молиявии аъзои ҷамъиятҳои суғуртаи мутақобила,
• кушодан ва пешбурди суратҳисобҳои шахсони воқеӣ ва ҳуқуқӣ аз ҷониби бонкҳо,
• иҷрои интиқолҳои маблағ аз ин суратҳисобҳо,
• идораи коғазҳои қиматнок.

Ҳамзамон, қонун шароитҳои шомилшавии ташкилотҳо ба таҷриба-ро сахттар мекунад. Ба унвони асос барои рад намудани сабти номи ташкилот дар феҳрист, риоя накардани дастурҳои Бонки марказӣ оид ба бартарафсозии қонуншиканиҳо ва мавҷуд будани аломатҳои эҳтимолии муфлисшавӣ пешбинӣ шудааст.

Қабули ин қонун ба гуфтаи муаллифонаш, заминаи мусоид барои рушди минбаъдаи бонкдории исломӣ дар Русия ва дастрасии бештари шаҳрвандон ба хизматрасониҳои молиявие, ки ба арзишҳои шариат мувофиқанд, фароҳам месозад.

Бо ин вуҷуд, бархе аз донишмандони исломӣ ба низоми татбиқи бонкдории исломӣ дар Русия бо шубҳа менигаранд. Онҳо бар ин назаранд, ки дар амал бисёре аз принсипҳои шариатӣ пурра риоя намешаванд ва ин раванд бештар шабеҳи танзими формалӣ ва намоишист, на татбиқи воқеии арзишҳои иқтисоди исломӣ.