Британия барои назорати исломситезӣ стратегияи нав роҳандозӣ мекунад

Ҳукумати Британия пас аз қатъ шудани маблағгузорӣ ба созмони Tell Mama, созмони наве бо номи British Muslim Trust (BMT)-ро барои назорат ва сабти ҳодисаҳои нафрати зиддимусулмонӣ таъйин кард. Ба гуфтаи мақомот, ин ташкилот аз оғози тирамоҳ мониторинги чунин ҳодисаҳоро оғоз мекунад.

Бино ба иттилои The Guardian қонуни нав таъсиси кумитаи махсус ва таҳияи низоми пурраи гузоришдиҳӣ дар бораи нафрат ба мусалмононро пешбинӣ мекунад. BMT ҳамчунин дастгирии мустақим ба қурбониён ва баланд бардоштани огоҳии ҷомеаро дар назар дорад.

Ин иқдом дар пасманзари болоравии ҷиноятҳои нафратангез нисбат ба мусалмонони Британия сурат мегирад. Қаблан, Tell Mama пас аз танишҳо бо мақомоти давлатӣ ва баҳсҳо атрофи шаффофияти истифодаи маблағҳо, маблағгузории ҳукуматиро рад кард ва фаъолияти мустақилро идома дод.

Раҳбари BMT, Акила Ахмад, изҳор дошт, ки ҳадафи асосии онҳо эҳё ва шунидани садои ҷомеаи мусалмонӣ ва мубориза бо нафрат аст. Мақомот умед доранд, ки ин иқдом ба таъсиси як ҷомеаи таҳаммулпазиртар ва амн барои ҳама мусоидат хоҳад кард.