Илёс Идрисзода: Мақомдорон беҳтар аст баъди нафақа ба Ҳаҷ раванд

Раиси Оҷонси хизмати давлатии Тоҷикистон Илёс Идрисзода тавсия додааст, ки хизматчиёни давлатӣ адои Ҳаҷро баъд аз ба нафақа баромадан анҷом диҳанд. Ӯ ин изҳоротро рӯзи 21 июл дар нишасти хабарӣ баён кард.

Ба гуфтаи Идрисзода, қонунгузорӣ барои сафари ҳаҷ маҳдудият намегузорад, аммо хизматчии давлатӣ бояд то анҷоми вазифа содиқона ба давлату миллат хизмат кунад ва баъдан метавонад ба Ҳаҷ равад.

Изҳороти ӯ дар пасманзари нигаронии бархе кормандони идораҳои давлатӣ садо медиҳад, ки тарс доранд бо рафтан ба Ҳаҷ аз кор озод шаванд. Дар гузашта мисли барканории Ҳусейнхон Ҳакимов баъд аз адои Ҳаҷ чунин мавридҳо низ ба қайд гирифта шуда буданд.

Ҳуқуқшиносон мегӯянд, барои хизматчиёни давлатӣ манъи ҳуқуқии сафари Ҳаҷ вуҷуд надорад, вале барояшон ҳамоҳангсозии сафари хориҷӣ бо роҳбарият ҳатмист.

Ҳар сол беш аз 6 ҳазор шаҳрванди Тоҷикистон барои адои Ҳаҷҷи фарзӣ ба Арабистони Саъудӣ мераванд.