Илм нур асту ҷаҳл зулмат

Мо мекӯшем, барномаҳое тарҳрезӣ кунем, ки ҳар як донишҷӯро бо таваҷҷуҳ ба истеъдод ва зарфияти инфиродиаш, ба сӯи маърифат, рушд ва камол раҳнамоӣ намоем.

ҲАДАФИ МО

1. Огоҳӣ ва бедорсозии ҷомеа, бахусус насли ҷавон, аз асли поку нобу раҳнамои Шариати Исломӣ ва илмҳои динӣ, бидуни таассуб, тангназарӣ ва ҳар гуна андешаҳои ифротӣ.

2. Баланд бардоштани сатҳи маърифати динии занон ва тавсеаи ҷаҳонбинии онҳо. Зеро ислоҳи зан пояи ислоҳи ҷомеа аст. Агар зан рушд кунад, ҷомеа рушд хоҳад кард.

3. Даъват ба сӯи шинохти Худованд, шинохти худ ва шинохти воқеияти зиндагӣ, то инсон аз ҳоли худ воқиф гардаду рисолати худро дар олам дарёбад.

ВАЗИФАИ МО

  • Фароҳам сохтани шароити омӯзишӣ барои занону кӯдакон, тавассути роҳандозии курсҳои босистем ва мақсаднок. Аз ҳарфомӯзӣ ва маълумоти ибтидоӣ, то расидан ба сатҳҳои баланди маърифатӣ ва илмӣ. Ин барномаҳо ройгон ҳама қишри ҷомеаро фаро мегиранд, новобаста ба синну сол, маҳалли зист ё вазъи иҷтимоиву иқтисодӣ.

  • Тарбия ва омода кардани насли бонувони босавод ва масъулиятшинос, ки бо дониш ва ахлоқи худ метавонанд чароғи роҳнамо барои ҷомеа бошанд ва дигаронро сӯи нур ҳидоят кунанд.

  • Ташкили озмунҳо ва мусобиқаҳои китобхонӣ ва илмӣ миёни кӯдакон ва ҷавонон — бо ҳадафи ҷой додани муҳаббати дониш, китоб ва маърифат дар дили насли наврас.

ТАМОС БО МО

Ҳолномаи муфассали сардабир

Муслима Нурмуҳаммадӣ (номи аслӣ — Саломат Нурмуҳаммадӣ), номзади улуми ҳуқуқи исломӣ (фиқҳ), соли 1987 дар Тоҷикистон, деҳаи Хиштхонаи ноҳияи Ашт, дар оилаи зиёӣ таваллуд шудааст.

Пас аз хатми мактаби миёна, ду сол дар мадрасаи ноҳияи Ашт таълими динӣ гирифтааст. Соли 2007 ба Ҷумҳурии Миср сафар намуда, ба факултаи дарсҳои арабӣ ва исломии Донишгоҳи Азҳар дохил шуда, онро соли 2013 хатм мекунад. Ҳамон сол, ба магистратураи бахши Фиқҳи муқорани (Фиқҳи чор мазҳаб) Донишгоҳи Азҳари Миср дохил шуда, ду соли аввали омодагӣ (тамҳидӣ)-ро сипарӣ намуда, ба таҳияи рисолаи илмӣ оғоз мекунад.
Дар вақти таҳсил дар Миср, ҳамзамон кулли Қуръони каримро ҳифз намуда, дар назди олимони маъруф, аз ҷумла Ҳасан Абуашбол ва Мустафо Адавӣ, дарсҳои Ақида, Ҳадис ва Тафсирро омӯхтааст. Соли 2020 ба магистратураи соҳаи Фиқҳи Донишгоҳи давлатии таҳқиқотии туркӣ “Онсэкез Март” дар шаҳри Чанакқалъа (Çanakkale Onsekiz Mart Üniversitesi) дохил шуда, рисолаи худро бо унвони ``Сафари зан бидуни маҳрам`` ҳимоя кардааст.
Бо забонҳои форсӣ (забони модарӣ), русӣ, арабӣ, туркӣ ва англисӣ гап мезанад.

Фаъолият
Солҳои 2017 – 2018 тарҷумони ширкати тиҷоратӣ дар АМА буд.
Дар солҳои 2018-2020 ба ҳайси Устоди омӯзиши забони арабӣ дар Омӯзишгоҳи курсҳои забони хориҷӣ дар шаҳри Алмаатои Қазоқистон фаъолият кардааст.
Айни ҳол ба таври шартномавӣ дар Донишгоҳи давлатии таҳқиқотии Туркия, “Онсэкез Март”, дар шаҳри Чанакқалъа устоди забони арабӣ мебошад.
Ҳамзамон, барои занҳо дарсҳои арабӣ, таҷвид, Тафсир, Ақида ва Фиқҳ меомӯзонад.
Бо духтарони хурдсол дарсҳои динӣ ва ахлоқӣ ташкил менамояд.
Баробари ин дар шабакаҳои иҷтимоӣ низ фаъол аст ва шабакаи ютубии “Rohi Nur” дорад. Ҳамвора дар мавзӯъҳои гуногуни исломӣ суханронӣ мекунад ва ба саволҳои корбарон ҷавоб мегӯяд.
Ҳаёти шахсӣ
Муслима Нурмуҳаммадӣ оиладор ва соҳиби панҷ фарзанд аст.
Шавҳараш, Абдурашид Мамадҷонов, хатмкардаи Донишгохи Азҳари Миср, факултаи тафсири Қуръони Карим мебошад.

РУШДИ МО

Нишондоди натиҷаи кӯшиш ва такмили доимии равандҳои кории мо

+13

Гурӯҳҳои дарсӣ

221+

Толибилмон

7 +

Устодон

1200+

Корбарони вебгоҳи мо

БО САДОҚАТ ВА МАСЪУЛИЯТШИНОСӢ

ТИМИ МО

Мо кӯшиш мекунем, кумак кунем, ки корбарон ва шогирдони мо биомӯзанд, рушд кунанд ва зиндагии худро дигар созанд.

Муслима Нурмуҳаммадӣ

Сардабир
Номзади илм дар соҳаи ҳуқуқи исломӣ (фиқҳ)
Хатмкардаи магистратураи бахши Фиқҳи муқоран (Фиқҳи чор мазҳаб) дар Донишгоҳи Азҳари Миср.
Рисолаи номзадияшро дар Донишгоҳи давлатии таҳқиқотии Туркия “Онсэкез Март” дар шаҳри Чанакқалъа ҳимоя кардааст.
Бо забонҳои форсӣ, арабӣ, туркӣ, русӣ ва англисӣ гап мезанад.

Сумая Назарӣ

Мудири таълимӣ
Хатмкардаи коллеҷи тиббӣ ва Донишгоҳи давлатии омӯзгории Кулоб ба номи Абуабдуллоҳи Рӯдакӣ мебошад. Таҷрибаи омӯзгорӣ дар дабистон дорад. Улуми исломиро назди устод Муслима Нурмуҳаммадӣ меомӯзад.

Бо забонҳои форсӣ ва русӣ гап мезанад. Донандаи забони арабӣ низ мебошад.

Фотима Собирӣ

Коргузори Маркази таълимии ``Роҳи Нур``
Хатмкардаи Донишкадаи исломии Тоҷикистон дар риштаи филологияи араб мебошад. Улуми исломиро дар донишкада фаро гирифтааст. Айни ҳол дар назди устод Муслима Нурмуҳаммадӣ илми сарфу наҳв ва балоғаи арабиро такмил медиҳад.

Бо забони форсӣ ва русӣ гап мезанад. Донандаи забони арабӣ низ мебошад.

Оиша Муҳаммадӣ

Сармуҳаррири расонаҳои ``Роҳи Нур``
Магистратураи ДДТ Тоҷикистонро бо ихтисоси ҳуқуқшинос, бо дипломи сурх хатм кардааст.  Соли 2024,  ENIC NARIC Austria (Маркази миллии иттилоот ва эътирофи тахассусҳои академии Австрия) дараҷаи илмии ӯро баробар ба дараҷаи магистр аз риштаи ҳуқуқшиносӣ эътироф кардааст. Улуми исломӣ, сарфу наҳв ва илми балоғаи арабиро назди устод Муслима Нурмуҳаммадӣ меомӯзад. Таҷрибаи омӯзгорӣ дар литсейи туркии толибилмони болаёқат дорад.
Бо забонҳои форсӣ, русӣ, туркӣ, англисӣ ва немисӣ  озодона ҳарф мезанад. Донандаи забони арабӣ низ мебошад.